O enigma de Qaf achéganos a historia do poeta heroe Al-Gatash, protagonista e autor da "Qafiya al-Qaf", o oitavo poema pendurado, unha epopea perdida no tempo, unha viaxe inesquecible por unha cultura milenaria. Atravesando unha terra máxica de desertos, xenios marabillosos, noites estreladas e cidades eternas, o heroe deberá resolver o enigma de Qaf para acadar o seu soño, contemplar o rostro de Layla.

Construída a partir de tres liñas narrativas -a historia do protagonista, as narrativas secundarias, complementarias da principal, e as lendas dos outros heroes árabes-, a trama reconstrúe (ou inventa) o universo máxico de toda a mitoloxía preislámica.

O prefacio e o postescrito do propio autor resultan imprescindibles para comprender a verdadeira complexidade dunha obra intelixente e marabillosa, que nos devolve ao universo do Sinbad de Cunqueiro; milleiros de quilómetros e un fondo océano afastan o Río de Xaneiro de Mussa do Mondoñedo natal deste galego imprescindible, pero o imaxinario dos xenios non entende de distancias.

Encuadernación: Rústica. Cosido

Páxinas: 280
ISBN: 978-84-608-4509-6
Data Edición: 2016